مطعم مسكون الجزء الأول - بقلم  باور حوران حم 

أنا باور حوران عمري ٢١ سنة،انا واهلي مغتربين تقريباً ١٣ سنة،أنا شب عذابي عم أسس حياتي ودير بالي على أهلي،المعيشة صعبة بس الحمدلله عم ندبر حالنا،يعني عم اشتغل بس يادوب طالع حق الأكل والمسكن والطبابة،بشتغل دوامين أنا من السبعة الصبح برجع الساعة ٣ عالبيت برتاح شوي برجع بروح الساعة ٦ ع دوام المطعم للساعة ٢ بالليل،عم حاول أمن حالي ومستقبلي متل أي شب صح عم اتعب بس مافي شي سهل وهيك الحياة،أحياناً بكون عم اشتغل وبغفى بس متأكد إنو ربنا رح يفرجها عليي ، حتى كنت اشتغل ايام العطل لأقدر قدر المستطاع اني حسّن من أحوالنا شوي

هيك كانت أجواء حياتي ليوم من الأيام صارت معي قصة بالمطعم لحد هلق بس اتذكرها بقشعر بدني ، أنا عامل توصيل لهداك المطعم يلي كنت بشتغل فيه ، الحمدلله قلت أحسن ما اقعد بالبيت لا شغلة ولا عملة ، والحمدلله شوي شوي توفقت أموري وصارت الأمور تتحسن

بتجيني طلبية ع منطقة ما بعرفها ولا داخل بحياتي عليها استغربت لأنو صرلي سنين بشتغل وولا مرة اجت طلبية عهديك المنطقة وكنت اعتقد انه هديك المنطقة مافيها بشر ومانها مسكونة من قِبل حدا ، والمطعم يلي كنت اشتغل فيه ما كان كثير معروف بس الاماكن المجاورة كانت تعرفها وما كنت روح ع مناطق بعيدة لهيك استغربت كثير ، ضبضت الطلبية وركبت الموتسيكل تبعي وانطلقت ، بعد ما قربت من المنطقة ولا صوت حسيت حالي بغابة ولك حتى اصوات حيوانات مافي بدي بس شي قطة شي كلب يمرق لاتطمن انو في حدا غيري هون ، اول ما دخلت رددت التعويذات مافي غير ضو القمر ، كانوا شي عشر بنايات ورا بعض والشبابيك مبينة بس بطريقة مرعبة وصوت شبابيك تتسكر وتنفتح ومافي ضو ، بلشت خاف لأنو بالليل وفايت ع منطقة مقطوعة ، شلت هالأفكار السلبية من بالي وقلت يلا بوصل الطلبية وبركب الموتسيكل وبروح بأمان الله ، مافي ولا بشري اسأله عن صاحب الطلبية او رقم الشقة او شي لافتة مكتوب عليها بيت فلان ، وقفت الموتسيكل ع جنب اتصلت ع المطعم وطلبت منهم يبعتولي رقم صاحب الطلبية ، تركت ضو الموتسيكل شغال والشارع كان كثير طويل بس مو مبين شي مني ، وأنا عم اتطلع عالموبايل ناطر ليوصلني الرقم ، وبس ارفع راسي بنصدم بشي ماكان مبين شكله كثير بس مبين عيون عم تلمع من بعيد تقولوا كأنو ضو ، قدمت شوي لقدام لشوف مين ارتعبت ورجعت لورا ، زمرت مرتين ثلاثة وما عم يتحرك بأرضه ، بلش خوفي يزيد كل شوي هاد المخلوق يقرب أكثر وأكثر بس كان شي شبه مغبش ما عم يتوضح  بيوصلني الرقم بطلع عالموبايل بس ارفع راسي بيختفي هاد المخلوق ما اهتميت كثير قلت يمكن عم هلوس

 

اتصلت عالرقم ما حدا رد اتصلت ثاني مرة سمعت صوت موبايل قريب بس ماني عارف بأي بناية او شقة قربت شوي شوي من الصوت لأعرف بالضبط بأي بناية بلكي صاحب الطلبية عم يدور علي كمان ، صرت امشي شوي شوي باتجاه الصوت فجأة ببطل اسمع شي وبينفصل الخط رجعت دقيت فتح الموبايل قلت الو بس كنت عم اسمع صوت ضحك هستيري عم اسمع الصوت بس مو عرفان وين ومن أي جهة مصدر الصوت ، رجعت لعند الموتسيكل بحكم اني كنت خايف ينسرق وبطل اعرف طريق الرجعة ، قلت شبني عم هلوس واتخيل رجعت دقيت ، فتح الموبايل ما قدرت ميّز اذا صوت ولاد ولا صوت نسوان ولا صوت رجال ما كان مبين لانو الصوت كان كثير غريب ولأول مرة بسمعه ، قلت يمكن الشبكة عم تقطش ، سألتهن  أنا معي طلبية أكل بس ماني عرفان بأي بناية انتوا ممكن بس تشرحلي وين بلاقي شخص ببين بس خيالو ع طابق رابع عم يرفع ايدو وبيحرك يمين وشمال . . . 

يتبع في مرة القادمة.......